الناس هيقولوا ايه

كلام الناس من الحاجات اللي للأسف أشخاص كتير جدا بتعمل حسابها أووي  

وكانت زي طوق حوالين رقبة اي انسان نفسه يحقق احلامه  اللي مش مألوفه بالنسبالهم

الناس هيقولوا ايه ؟

خلينا متفقين ان الناس شغلتها الاساسية الكلام

 وممكن يجيلها استبحس لا قدر الله لو متكلمتش واحنا طبعا منرضاش بالضرر للغير

والاهم من الغير اننا مينفعش نرضي بالضرر لنفسنا عشان شوية  كلام فاضي وعلي بيل المثال

سيناريو رقم 1

 دي متجوزتش ياواقعه سوده .. يابنتي حرام عليكي إلحقي القطر هيفوتك 

* حبيبتي روحي عند السكه الحديد وتابعي كم قطر بيمر ف اليوم

وبعدين عادي جدا 

القطر لو فات في طياره ولو بتخافي .. في اتوبيسات وعربيات حتي التوكتوك وصل 

المواصلات كلها موجوده ..بأمر الله

البنت اتجوزت والحمد لله بعد شهر واحد من الجواز

سيناريو رقم 2 

ايه مفيش حاجه ؟

حاجه زي إيه ياطنط انتي وهي

حاجه كده  بتقول واء واء  عايزين نطمن عليكي 

ياحرام دي لسه ربنا مرزقهاش بحتة عيل يملي عليها الدنيا

سيناريو رقم 3 ( الشيطان يعظ )

ولولا قدر الله في مشاكل كتير بين الزوجين وربنا الوحيد اللي اعلم بحالهم

يخترعوا اي حدوته ويزودوا عليها كلمتين ويبدأو في دور الواعظ ليها وله 

يابنتي الست ملهاش غير بيت جوزها ومن الاخر احنا معندناش بنات تتطلق انسي الموضوع ده خالص

نفس ذات الناس . تروح للزوج تقوله هي مالها محدش مالي عنيها ليه 

ده انت بلسم اقولك

 انت لو راجل بصح تكسر نفسها وتتجوز عليها من بكره ست ستها

وممكن جدا ربنا يهدي الحال ويرجعوا لبعض بالعند فيهم 

وبرده الناس هتتكلم قال مبيحبوش بعض قال كل ده تمثيليه بيعملوها قدامنا عشان يبعدوا بيها العين عنهم

احنا اللي غلطانين هو احنا بنكرههم ؟ هو احنا عايزين نخرب عليهم

سيناريو رقم 4

واحد عايز يسيب شغله الاساسي مثلا ويشوف فرصه تانيه في مجال هو موهوب فيه 

طبعا بيكون في اعتراض ورسائل خوف مباشره غير مباشره للايام الصعبه اللي في انتظاره

بقا تضحي بشغلك الاساسي عشان شوية كلام فارغ 

ووظيفه مضمونه عشان تروح ....... وانت عندك بيت ومسئول عنه

وبعدين انت لسه هتجرب حاجه جديده  واللي تعرفه احسن من اللي متعرفهوش

سيناريو رقم 5

واحد مكملش تعليمه وجه الوقت انه يكمله 

ياخي حرام عليك الفلوس اللي تدفعها في الكتب والمواصلات وفرها واعملك مشروع

يااااااااه بعد ماشاب ودوه الكتاب

هما اللي اتعلموا خدوا ايه

ولو بنت هي اللي عايزه تكمل تعليمها

الفلوس اللي تصرفيها علي الجامعه يبقي تشتري بيها تلاجه ولا غساله 
حاجه تنفعك في بيتك وجهازك

وبعدين هي البنت ليها الا بيت جوزها

المهم غالبا بتكون النتيجه واحد صفر لصالح الناس

وخد عندك حاجات كتير جدا 

دي لبسها مش عارفه ماله 

وده تسريحة شعره شكلها غريب

ودي س وده ج 

طيب وبعدين

هل المفروض اننا نستجيب لرأي الناس وكلامهم ونعمل حسابهم أكتر من ربنا

في حاجات كتير جدا الناس بتعلن رفضها ليها وهي اصلا حلال

بقا شئ سخيف جدا ان الانسان بيعمل حساب الناس وميعملش حساب ربنا وعقله ومشاعره ونفسه

عشان كده غالبا الانسان ده بيموت وبرده مش هيسلم من كلام الناس

هيا بنا الي الجانب الاخر( الجانب المشرق )

الفريق التاني بقا ده فريق المتمردين 
اللي كلام الناس عنده زي فقاعات الصابون بتختفي قبل ما توصل ليه

بيعمل اللي هو عايزه .. وشايل شعار انا هعيش الحياه مره واحده بس .. يبقي ليه حد غيري يعيشها ليا 

عادة الناس دي بيكون في سلام نفسي كبير جدا في حياتهم وبيحققوا احلامهم خطوه بخطوه 

لانهم ركزوا علي حاجتين وبس

حلال ولا حرام  ؟
انا عايز ايه  ؟

وغالبا برده الناس مش هتسيبهم في حالهم بس بطريق مختلف

شوفتوا وصلوا لايه ..

 ربنا راضي عنهم

محظوظين

اللي اداهم يدينا ياسيدي

 الخلاصه 

اللي عايزه اقولها من الصبح . بصوت الفنان جورج وسوف

كلام الناس لا بيقدم ولا يأخر . كلام الناس ملامه وغيره مش أكتر

وبصوت الفنان محمد فؤاد

سيبهم يقولوا .. مهما يقولوا .. إيه خدنا منهم غير الكلام

شارك هذه الصفحة وتابعنا على صفحاتنا الرسمية

شارك الموضوع →

تويت

تابعنا →

إنشر الموضوع →